نصائح من واقع تجارب السنين اللي فاتت
دي إجتهادات شخصية تحتمل الخطأ قبل الصواب.. إحنا بنجتهد وعلى الله القبول..
١- إوعى تنسى البروتين الحيواني، فراخ ولحمة، لو إمكانياتك ما تسمحش تعمل شنطة فيها فراخ، بلاش شنطة جافة خالص ووزع على كل أسرة فرختين.
٢- كراتين كارفور وشنط رمضان اللي ب ١٠٠ و ١٢٠ جنيه معظمها من غير فراخ، الأسرة بيبقى عندها ١٠ كيلو رز و٣٠ كيس مكرونة ومفيش فرخة في الثلاجة.
٣- حاول تزود الكميات على حساب عدد الأصناف، ما تفرحش بالشنطة اللي فيها نص كيلو عدس ونص كيلو فاصوليا، العدس انواع ودرجات والبقوليات كذلك، الأسرة الكبيرة حتضطر تشتري نص كيلو كمان عشان تكمل الوجبة وممكن يبقى نوع مختلف في التسوية مثلا ويبوظ الأكلة.
٤- الأقربون أولى بالمعروف.
٥- اللوبيا مش محبوبة للأسر، دي نتيجة توصلنالها بعد ما عملنا استفتاء ل ١٠٠ أسرة بنوزع عليهم الإطعام شهرياً، الأسر طلبوا إننا نشيل اللوبيا ونحط مكانه عدس بجبة أو عدس عادي.
٦- الفول.. سحور رمضان.. لا غنى عنه في رمضان.
٧- بلاش الرز الرخيص، بلاش كيس المكرونة ابو ٣ جنيه، بلاش تسترخصوا في المكونات، لن تنالوا البر حتى تنفقوا مما تحبون..
٨- كيس ملح في كل شنطة، حتقولي يعني هما مش حيعرفوا يشتروا كيس ملح ابو جنيه؟حقولك لا حيشتروا.. بس الشنطة حتخلص في يومين وكيس الملح حيقعد اسبوعين، وحيدخل في كل طبخة، وكل رشة ملح بحسنة.
٩- اللحممممة... لو تقدر تحط كيلو لحمة أو توزع لحمة بس، اللحمة دلوقتي بقت غالية وأسر كتير نفسها فيها وما بتقدرش تشتريها.
١٠- لو حتحط قمر الدين من باب الإحسان بلاش قمر الدين المصري أبو ١٠ جنيه، ده مياه ملونة بسكر، قمر الدين النضيف غالي، اللفة فوق ال ٢٠ جنيه، شاور نفسك بقى تحط لفة قمر الدين أو ٢ كيلو رز براحتك... دي مدرسة أولويات وكل واحد ومدرسته.
١١- الفراخ الفراخ الفراخ..
١٢- لن تنالوا البر حتى تنفقوا مما تحبون..
١٣- بلاش ترهق نفسك بعمل نوعين شنط كبير وصغير، إعمل شنطة واحدة صغيرة والأسر الكبيرة تاخد شنطتين.. ده أسهل في التوزيع والتعبئة والعدد والحصر.
١٤- حاول تفتكر الاطفال بحاجة في الشنطة... الطفل مش حيفرح بالرز والفراخ... حيفرح بعلبة البسكويت اللي ب ١٠ جنيه، الأطفال بتسعد القلب.
١٥- يا ريت كل شنطه يكون فيها كيلو لبن.
*لو إمكانياتك تسمح تدبس في الشنطة ظرف صغير شيك فيه مبالغ مالي حسب الإستطاعة يكون شيء جميل.
لن تنالوا البر حتى تنفقوا مما تحبون
رمضان كريم
تعليقات
إرسال تعليق