احيانا اللي قدامك يعمل موقف معين يكون منتهي قلة الذوق او يقولك كلمة تقطع فيك زي السكين .. او تكون محتاج ليه و بكل سهولة يتخلي عنك او يتكلم باسلوب مفيهوش ادني احساس .. ومن الجايز جدا ان الحجات دي تكون متكررة منه .. بس انت بتتحملها و بتعديها .. مرة فـ مرة علي أمل انه يتغير او يحس بيك لكن للاسف مافيش فايده .. ومع كل موقف بيهدك و كل كلمة بتوجعك بيتبني حاجز جواك ناحيته .. وتتشال حتة من غلاوته في قلبك .. لغاية متوصل لمرحلة انك خلاص بتقفل منه و بتفقد الأمل فيه او بالأصح تقطع الرجا منه .. الموقف دة على قد ما ب يبقى فيه كمية حزن مهولة و حسرة من جواك علي ايام عمرك اللي ضاعت مع الشخص دة .. و الوهم اللي انت كنت عايش فيه انه يتغير علي قد ما بيكون الموقف دة مريح جدا .. و علي قد مابيألمك علي قد مبيفوقك من الاستسلام اللي مالوش معني اللي كنت فيه لشخص بيستغلك اسوء استغلال حسب اهوائه ومزاجه وبس وانت مش فارق معاه بأي شكل .. وقتها الحبل اللي انت كنت لافه على رقبتك و هوة ساحبك منه وعمال يخنقك بيه هو قطعه ب ايده .. في اللحظة دي بتتحرر منه و من حبه و من سيطرته و تأثيره عليك .. وقتها احساسك بالحرية وانك بقيت مِلك نفسك و قلبك بايدك انت كفيل انه يعوضك عن كل لحظة وجع عيشتها بسبب الشخص دة و يمحي كل دمعة نزلت من عيونك قهر بسببه .. أحيانا قطع الرجا نعمة
تعليقات
إرسال تعليق